Catálogo

DVD explicativo das medidas preventivas que se deben adoptar respecto dos equipos de traballo a bordo de buques de pesca. Está dirixido aos traballadores do mar.

Estudo arquivístico do fondo documental da familia Aperribay Pita da Veiga. Comprende o contexto histórico-social, a forma de entrada no arquivo e o contido da documentación. Complétase co inventario da documentación, que vai acompañado de índices cronolóxicos, alfabéticos e ilustracións.

A liña de traballo consistente na publicación de material epistolar da autoría de sobranceiras figuras da nosa literatura ou dos nosos estudos filolóxicos, ten unha nova contribución en Cartas a Fermín Penzol, quen foi ilustre mecenas da cultura galega. Ramón Piñeiro, Ben-Cho-Shey, Cabanillas e Otero Pedrayo son os autores deste moi interesante feixe de cartas que se reproducen con escrupuloso respecto aos textos orixinais e se completan con observacións críticas co engadido de abondosas notas a rodapé.
O limiar e mais a nota de edición caracterizan e xustifican o contido deste libro e as súas peculiaridades filolóxicas.

Volume preparado para presentar a totalidade da obra escrita do ensaísta García-Sabell dentro dun mesmo paradigma hermenéutico. Está dividido en dúas partes: a primeira debulla os principios teóricos, mentres que a segunda remata por ser unha aplicación á cultura galega do tempo que lle tocou vivir (segunda parte do século XX). Como pano de fondo que se mantén ao longo de todas as epígrafes esculcados, mantense unha mesma secuencia: unha breve introdución a cada capítulo seguida dun desenvolvemento tripartito.

A publicación Preguntas reais ou preguntas retóricas recolle as distintas reflexións sobre os criterios que deben guiar as actuacións dos servizos de actividades e proxectos educativos dentro do marco dos museos e centros culturais, conclusións froito das charlas dos especialistas que participaron nas xornadas e encontros de educación artística realizadas no Centro Galego de Arte Contemporánea e no Centre Civic Sant Andreu en maio do 2006.
 

María José García Blanco é a responsable desta nova edición da tradución a castelán do Códice Calixtino, presentada en 1951 polos profesores A. Moralejo, C. Torres e J. Feo, e reeditada pola Xunta de Galicia en 1993, 1999 e 2004. A profesora García Blanco xa participara con J.J. Moralejo na revisión de 2004. Preséntase agora unha nova edición revisada e corrixida, que inclúe novos rexistros bibliográficos.

Edición de carácter bibliográfico que recolle a reprodución literaria galega anual tanto no ámbito de creación coma no da información relativa á posta en escena de obras literarias, premios e revistas en formato CD. Resultado do proxecto de investigación "Informes de literatura", que se desenvolve no Centro Ramón Piñeiro para a Investigación en Humanidades

Edición actualizada da guía do conxunto patrimonial do Museo e o Castro de Viladonga, elaborada polos servizos técnicos do Museo baixo a dirección do centro, estruturada en catro capítulos que se corresponden coas salas de exposción permanente; feita nos dous idiomas oficiais de Galicia e acompañada dos textos en alemán, francés e inglés. Ademais de destinarse á venda ao público, a publicación servirá para os intercambios bibliográficos que estableceu o Museo con institucións similares, o que supón un notable incremento da súa biblioteca auxiliar especializada.

Obra que resume o proceso de romanización en Bueu e contextualízaa na península do Morrazo e na Galaecia romana. A base para iso son as escavacións realizadas nesa localidade hai uns anos dunha factoría de salgaduras e uns fornos romanos. Os datos extraídos e os materiais arqueolóxicos permiten engarzar cunha parte importante do discurso do Museo Massó cuxa orixe se encontra nunhas fábricas de conservas contemporáneas. Publicación ilustrada con fotografías, debuxos e mapas con carácter divulgativo.

Catálogo correspondente á exposición conmemorativa da entrega da doazón de 93 obras de arte por dona Carolina González Abad, no seu nome e no do seu marido, don Manuel Santiago Blanco, a favor da Xunta de Galicia, para a súa exposición, estudo e custodia no Museo de Belas Artes da Coruña.

Catálogo da exposición do Museo de Belas Artes da Coruña, no que se presentan máis de 150 obras, entre óleos, debuxos, acuarelas e litografías que reflicten espazos, ambientes, tendencias e manifestacións das novas formas de consumo e ocio no medio urbano entre finais do século XIX e as primeiras décadas do século XX.

Publicación que recolle os traballos presentados no III Congreso de Manuel Luís Acuña: conferencias, relatorios, mesas redondas...