Catálogo

Primeira entrega do cobizoso proxecto que lle ofrece ao público a obra completa de Juan Montes, un dos representantes de maior poder creativo da música culta galega. A empresa desenvólvese coa garantía dun musicólogo de tan gran compromiso co noso patrimonio como é o padre Calo, quen, á parte de preparar a edición, achega un magnífico estudo introdutorio, no que refire con todo detalle os avatares que conduciron á creación das partituras que este volume fornece.

Obra coeditada pola AGADIC e Dos Acordes dentro da colección Ars Gallaeciae Musicae, serie Agra Vella. A publicación engloba obras para piano de Juan Montes froito fundamentalmente do baleirado dos fondos conservados no Seminario de Lugo e no convento das Clarisas de Monforte, en edición crítica de Joám Trillo e coa introdución de Carlos Villanueva.

Entre o despuntar de Atlántica e o xurdir da Facultade de Belas Artes de Pontevedra desenvólvese en Galicia o traballo dunha importante nómina de artistas de moi diferente procedencia académica e cos máis diversos horizontes estéticos e conceptuais. Nesa paréntese fecunda, loitarán por ampliar a visibilidade da súa obra en condicións adversas nunha sorte de terra de ninguén na que sempre será dificultuso atopar sinais de orientación e referencia. Arranca entón una apaixonante diversidade de propostas e de nomes (por fin abundantes nomes de muller), tamén moi crecente en número, se a comparamos coa xeración anterior. Esa apaixonante diferenza tivo un constituínte común, que non era outro ca a autoconciencia do feito artístico e da incontrolable contaminación de linguaxes. Foron as súas rupturas da representación.

Publicación ideada en 2013, durante a preparación da mostra individual Clearblueskydeepdarkwater, de Grahan Gussin, no Centro Galego de Arte Contemporánea. O comisario da exposición e daquela director do CGAC, Miguel von Hafe Pérez, e o propio Gussin convidaron un conxunto de críticos e outros profesionais do mundo da arte, dalgún xeito vencellados coa traxectoria do artista, a escribiren sobre a súa obra ou sobre algún aspecto concreto do seu traballo. O resultado foi esta colaxe de impresións, reflexións e propostas, que nos devolve un retrato fiel do artista e un percorrido polos temas fundamentais do seu universo creativo.
Graham Gussin (Londres, 1960) utiliza unha gran diversidade de medios para explotar a nosa percepción do tempo, do espazo e da escala. As súas obras adoitan manipular e apropiarse de imaxes e narracións literarias extraídas da historia da arte, da cultura popular e, sobre todo, do cine.

Nos inicios do Movemento Abstracto, nas décadas do cincuenta e sesenta, os artistas Molezún, Mampaso, Labra e Caruncho teñen una presenza moi activa no seu desenvolvemento. O catálogo desta exposición afonda nese período de grande interese para a arte galega contemporánea. Por medio de escritos e textos de historiadores e críticos, e a selección de obras, analízase a traxectoria dos artistas relacionados no contexto histórico 1950/1970.

Editado con motivo da exposición celebrada no Museo de Belas Artes da Coruña do 20 de febreiro ao 14 de maio de 2015, este catálogo é unha completa publicación que ofrece unha análise pormenorizada dunha etapa fundamental na formación de Picasso, a comprendida entre 1891 e 1895. Estuda con detalle as experiencias e as ensinanzas colleitadas neses anos cruciais para poder comprender dun xeito máis profundo a repercusión que tivo a súa obra. Presenta dez seccións, cos correspondentes textos que explican o contido da mostra, xunto coas imaxes das obras expostas.
Os textos realizáronos a comisaria, Malén Gual, xunto con outros especialistas, como Xosé R. Barreiro, X. Antón Castro, Rafael Inglada, Marilyn McCully, César Antonio Molina, Elena Prado, Eduard Vallès ou Rubén Ventureira.
Complétase cunha bibliografía xeral, a relación catalográfica das preto de máis de 200 obras que forman parte da mostra e e a tradución dos textos ao inglés.

Catálogo da exposición fotográfica “En Camiño”, de Silvia Steinbach. As fotografías recollen imaxes do Camiño Francés e da cidade de Santiago de Compostela; un percorrido por distintos espazos naturais e culturais que compón un relato plural sobre a experiencia da peregrinación.

Catálogo da exposición do mesmo nome, celebrada na cidade de Lugo entre os meses de setembro e decembro de 2006. Ademais da relación de pezas da exposición, este libro recolle, entre outros, estudos referentes á vida do santo, a evolución do seu culto, a historia das festas de San Froilán, etc.

Libro que acompañou a exposición do mesmo nome e que se puido ver en Celanova entre os meses de setembro e decembro de 2007, co gallo do MC aniversario do nacemento de san Rosendo. A publicación recolle estudos referentes á vida do santo, así como á súa relación co Bierzo e Portugal, mostrando como herdanza de san Rosendo o patrimonio artístico do propio mosteiro de Celanova.

Libro que acompañou a exposición do mesmo nome e que se celebrou en Santiago de Compostela entre os meses de xullo e agosto de 2007, co gallo do MC aniversario do nacemento de san Rosendo. A publicación recolle estudos referentes á vida do célebre santo e a distintos aspectos da Europa do século X (arte, relixión, literatura, sociedade, etc.).

Libro que acompañou a exposición do mesmo nome e que se celebrou en Mondoñedo entre os meses de maio e xuño de 2007, co gallo do MC aniversario do nacemento de san Rosendo. A publicación recolle estudos referentes á vida do santo, a evolución do seu culto, a fundación de mosteiros, a súa influencia na vida relixiosa e política na Galicia do seu tempo, etc.

Nesta terceira entrega do proxecto “Opus monasticorum”, que acomete o estudo e investigación da arte beneditina nos Camiños de Santiago, a análise céntrase no mosteiro de San Xulián de Samos. A recompilación de artigos aborda a historia deste centro monástico e a súa repercusión na arte e na cultura. Nesta obra, a través da contribución de máis dunha ducia de expertos, analízanse polo miúdo aspectos artísticos, arquitectónicos, socioeconómicos e políticos. A publicación inclúe un CD-Rom cun apéndice documental.