Catálogo

A base da publicación é a tese de doutoramento de Alfredo Erias “Iconografía de las tres iglesias góticas de Betanzos: San Francisco, Santa María do Azougue y Santiago". O estudo polo miúdo das imaxes que acubillan estas tres igrexas amosa o mellor que nos pode ofrecer o gótico galego desde un punto de vista iconográfico: unha manifestación palpable do pacto tácito entre os cabaleiros trastamaristas triunfantes e a Orde franciscana, que tamén triunfa nas vilas de Galicia.

Número especial da revista "Ad Limina", dedicado a aspectos relevantes do franciscanismo vinculado á cultura xacobea, editado no marco da celebración do VIII Centenario da Peregrinación de San Francisco de Asís a Compostela.

Percorrido pola historia da cociña monacal galega, que se abre cun breve texto de presentación de Miguel Vila, para nos introducir a continuación Xavier Castro no mundo da respostaría dos conventos e mosteiros de Galicia. A publicación complétase cunha guía dos principais cenobios do país, así como cunha breve recensión histórica de cada un deles, datos prácticos e as súas principais receitas.

Recentemente foi localizado nos fondos do Arquivo Provincial de San Francisco de Santiago (APFS) un caderno manuscrito titulado "Algunos cortes de arquitectura", redactado por Francisco Antonio Fernández Sarela, arquitecto compostelán do século XVIII e pai dunha gran saga de artistas, á cabeza dos que se atopa Clemente Fernández Sarela. Esta obra recolle o estudo de Miriam Elena Cortés López verbo deste texto, a súa transcrición e mais a reprodución do orixinal a través de fotografías a toda cor.

No ano 1914 o padre Atanasio López publicaba o traballo máis completo sobre a vinda de san Francisco de Asís a España na revista fundada por el mesmo, "Archivo Ibero-Americano" (Revista Franciscana de Estudios Históricos). Preséntase aquí unha transcrición desa publicación e un breve estudo introdutorio sobre a figura do P. Atanasio López escrito polo padre Hipólito Barriguín.

Edición en castelán da guía visual do Museo Massó. Faise un percorrido pola exposición permanente do museo, con textos breves e moitas imaxes en cor das pezas da colección, acompañadas con textos ao pé da ilustración.

Número dous da revista científica Ad limina, de carácter interdisciplinar e internacional, multilingüe, de investigación sobre o Camiño de Santiago e o fenómeno das peregrinacións.

Revista de carácter científico que recolle artigos dos mellores especialistas do mundo sobre todo o relacionado co Camiño de Santiago (arte, historia etc.).

Número tres da revista científica Ad limina, de carácter interdisciplinar e internacional, multilingüe, de investigación sobre o camiño de Santiago e o fenómeno das peregrinacións.

Actas do VIII Congreso de Estudos Xacobeos, celebrado en Santiago de Compostela con motivo do ano xacobeo 2010. O volume continúa a colección científica da Xunta de Galicia, interrompida dende o ano 2005.

Libro catálogo que recolle unha serie de artigos sobre a figura de san Francisco de Asís e a tradición da súa peregrinación a Santiago de Compostela hai 800 anos. Ademais presenta o catálogo de obra da exposición do mesmo nome que se inaugurou en agosto de 2013 en Asís (pintura, ourivería, escultura, etc.).

Edición do número 24 (ano 2014) da revista Croa, órgano de expresión científica e difusión cultural do Museo do Castro de Viladonga, elaborado polo propio centro, coa colaboración da súa Asociación de Amigos, con dez artigos ou apartados de tema patrimonial (arqueolóxico, histórico e etnográfico). Este boletín serve ademais para establecer intercambios bibliográficos con outras institucións e asociacións similares, o que supón un notable incremento da biblioteca auxiliar especializada do Museo.