Proxecto expositivo experimental que leva a cabo o poeta e escritor Antón Lopo que se desenvolveu na Casa da Parra e que ten como precedente unha serie de experiencias compartidas no bulleiral de Portocarreiro, Arzúa.
Este libro dá continuidade ao proxecto iniciado anos atrás de describir a fauna de Galicia tratando de maneira independente cada un dos filos animais presentes nas augas de Galicia. Neste caso, o libro está dedicado aos anélidos, un grupo extenso, ubicuo e de gran relevancia ecolóxica nas nosas augas. O libro trata de ofrecer unha ferramenta visual para a identificación destes animais sumamente interesantes pero que, en xeral, son moi descoñecidos. Mediante fotografías realizadas no seu hábitat natural, as especies coñecidas en Galicia son caracterizadas e descritas de maneira detallada, o que permite que o libro poida ser de utilidade para toda a persoa interesada, tanto profesional como afeccionada, desde biólogos, educadores científicos, mergulladores curiosos, pescadores e ata calquera a quen, de maneira ocasional, lle guste achegarse a observar as zonas intermareais.
Informe no que se presenta o estado actual do desenvolvemento da responsabilidade social empresarial (RSE) nas empresas galegas, que permite coñecer a relación entre o compromiso das empresas coa RSE e o desempeño económico que pode derivarse das prácticas responsables ou outros efectos na vida das empresas; e coñecer cal é o estado actual do compromiso das empresas cos Obxectivos de Desenvolvemento Sustentable (ODS).
Cartel coas medidas preventivas que hai que ter en conta ante as picaduras de carrachas.
Cadernos de Fraseoloxía Galega rende homenaxe a fraseóloga cubana María Luisa Ortiz Alvarez no seu número 26 con seis artigos interdisciplinares sobre a fraseodidáctica, a fraseoloxía bíblica, a linguoculturoloxía comparada, as expresións gastronómicas e a fraseotradución asistida por IA xenerativa, en diferentes linguas (portugués, francés, español, italiano...). Na sección “Varia” recóllense dous artigos dedicados á fraseoculturoloxía contrastiva chinesa-francesa e ás expresións figuradas nun contexto hospitalario. No apartado “Recadádivas” preséntase un dicionario galego de linguaxe figurada animal e unha compilación de unidades fraseolóxicas das Cantigas de Santa María. Pechan o número nove apuntas de obras recentes do ámbito fraseolóxgico e unha selección das novidades bibliográficas publicadas en 2024 (Novas).
Boletín divulgativo en formato PDF aloxado na web Xanela aberta https://vida-saudable.sergas.gal/
Neste boletín inclúese información sobre temas de actualidade relacionados coa promoción da saúde, unha receita de tempada e a axenda de actividades realizadas nas áreas sanitarias.
O Observatorio de Prospectiva do Mercado de Traballo analiza neste informe a situación da muller no mercado laboral galego, pola vez que o pon en consonancia co mercado laboral nacional nos aspectos máis relevantes. O propósito é ofrecer un panorama recente da situación e do comportamento das mulleres neste ámbito, centrándonos no ano 2025, a través da súa participación nos principais indicadores de emprego.
O solucionario do manual do Curso de introdución á lingua e á cultura galegas está pensado para axudarche no teu proceso de aprendizaxe dun xeito gradual, práctico e conectado coa realidade galega. Cada unidade integra contidos de fonética, de gramática, léxico útil e cultura. Nel atoparás as respostas aos exercicios e actividades propostos no manual para aprender e practicar a lingua dun xeito ameno e activo.
Este curso está dirixido a aquelas persoas que teñan interese pola lingua galega e a súa cultura, tanto se teñen coñecementos previos como se comezan desde cero.
Esta publicación recolle os traballos presentados por especialistas nacionais e internacionais no XIII Congreso Internacional de Estudos Xacobeos que o Comité Internacional de Expertos do Camiño de Santiago realizou en Compostela do 26 ao 29 de xuño de 2024. Baixo a dirección de Klaus Herbers, catedrático de Historia Medieval e Ciencias Auxiliares na Universität Erlangen-Nürnberg de Alemaña, e co título de Metrópole: Santiago e Roma, 900 anos de historia, o congreso conmemorou unha efeméride: a concesión polo papa Calisto da dignidade arcebispal á cidade de Santiago en xuño de 1124, que converteu Compostela nun importante centro de poder eclesiástico e administrativo.
Número dezaseis de Ad Limina, revista de carácter interdisciplinar, internacional e multilingüe de investigación sobre a ruta xacobea e o fenómeno das peregrinacións. Nesta ocasión, e baixo o título A novela histórica sobre a Idade Media e o Camiño de Santiago, estúdase a representación medieval do Camiño nas novelas históricas, así como os seus editores, autores etc. Os artigos que lle dan forma a este volume analizan publicacións relativas a este tema editadas nos últimos corenta anos no mundo hispano, francés e anglosaxón. Turismo de Galicia e a S.A. de Xestión do Plan Xacobeo publican, desde 2025, dous números ao ano, con cadansúa parte monográfica e xeral.
O presente documento ten como finalidade definir un modelo organizativo de atención colaborativa en saúde mental no ámbito da Atención Primaria, incorporando de maneira efectiva a psicoloxía clínica no primeiro nivel asistencial. Este modelo oriéntase a mellorar a detección, a abordaxe e o seguimento dos trastornos mentais comúns, reforzando a coordinación entre niveis asistenciais e optimizando o uso dos recursos dispoñibles. Así mesmo, pretende garantir á cidadanía unha atención á saúde mental máis accesible, homoxénea e equitativa en todo o territorio.
O Centro Ramón Piñeiro para a Investigación en Humanidades acolle esta obra, elaborada por catedráticos da Facultade de Química da Universidade de Santiago de Compostela, que convida os lectores interesados na historia da ciencia a afondar na vida de Antoine-Laurent Lavoisier, impulsor da química moderna e figura clave na situación sociopolítica que deu lugar á Revolución francesa. Nesta contribución abórdase a implicación de Lavoisier na política francesa de finais do século XVIII ao mesmo tempo que se analiza o seu papel na transformación da vella alquimia nunha ciencia baseada na experimentación, na precisión cuantitativa e nunha nova terminoloxía científica.
