Catálogo

Nicolás Combarro (A Coruña, 1979) pertence a unha nova tipoloxía de fotógrafo en cuxa obra, centrada na arquitectura e na idea de construción, retroalimentándose, a práctica da documentación e a intervención, entendida esta última como acción no espazo e na paisaxe. A súa exposición no CGAC reúne algunhas das súas series máis recentes, Arquitectura oculta, Bangkok e Arquitectura espontánea, esta última resultado dun uso calibrado do propio arquivo e de observacións sistemáticas sobre edificacións sen autor ou populares. Ademais, a exposición inclúe unha reinterpretación do espazo concibido polo arquitecto portugués Alvaro Siza Vieira mediante fotografías de proxeccións que se integran na súa serie Desvelar_desplazar.

Lugar: continxencias de uso constitúe un achegamento á significación existencial do espazo arquitectónico. O proxecto mostra obras de Patricia Esquivias, Luciana Lamothe e Sofía Táboas producidas para distintos espazos do edificio de Álvaro Siza. Os traballos destas tres artistas falan do tectónico, da morfoloxía dos materiais aos elementos constructivos; da dimensión histórica e simbólica á perceptiva e cognitiva, que é, en último termo, o fin que xustifica a construción espacial, polo tanto, a arquitectura.

O traballo de Julião Sarmento formalízase desde o fronteirizo. Moitas das súas obras conteñen imaxes de imaxes e están relacionadas entre si, aínda que funcionen de maneira independente, abrazando a ambigüidade do seu significado. Trátase de microrrelatos que asumen a múltiple potencialidade do cine, entre o expreso e o secreto, entre o persoal e o estraño. Tamén comparten con este unha clase de duración suspendida. Toda a obra de Julião Sarmento proxecta esa sensación cinematográfica, porque no que vemos sempre intuímos algo que se mantén ausente, fóra de escena. Este libro, con textos de David Barro, Margarita Ledo e Santiago Olmo, ofrece unha visión panorámica da súa obra e incide na relación da súa práctica artística co cinematográfico.

[EX]posicións críticas. Discursos críticos na arte española, 1975-1995, configúrase como un catálogo de tres mostras simultáneas e complementarias, que catografan as que foron as liñas emerxentes máis significativas da crítica de arte mediante a revisión e relectura dunha serie de diversas exposicións de arte producidas nese período; amosa obras dos artistas españois presentes nelas, así como abundante material documental para contextualizar os diferentes e sucesivos episodios. Ademais dos textos do director do proxecto, Santiago Olmo, e dos comisarios das exposicións, Armando Montesinos e Mariano Navarro, o libro reproduce en formato facsímile unha selección de textos clave para mellor comprender a evolución da escena artística en España desde a transición ata a actualidade.

O obxectivo deste documento é difundir o proxecto de biblioterapia entre pacientes e público en xeral. Este proxecto xurdiu durante unha colaboración da Consellería de Sanidade con pacientes afectados por depresión e as súas familias. Con este punto de partida, a Axencia Galega para a Xestión do Coñecemento en Saúde comezou a traballar na articulación dunha iniciativa para revisar a evidencia científica dispoñible sobre o uso dos libros con fins terapéuticos e na implementación do proxecto

O obxectivo desta publicación é poñer en marcha un proxecto de biblioterapia que xurdiu durante unha colaboración da Consellería de Sanidade con pacientes afectados por depresión e as súas familias. Con este punto de partida, a Axencia de Coñecemento en Saúde (ACIS) comezou a traballar na articulación dunha iniciativa para revisar a evidencia científica dispoñible sobre o uso dos libros con fins terapéuticos e na implementación do proxecto.

Daniel Pernas Nieto foi un poeta lugués, colaborador na prensa cultural e literaria do seu tempo (Galicia, Follas Novas, Vallibria, El Eco de Villaba) e cura ecónomo na parroquia de Santiago de Baroncelle. Como poeta, deixou esparexidas diversas composicións e conseguiu publicar, en lingua galega, o seu único poemario, Fala das Musas, que apareceu nos tráxicos días do Nadal de 1936 e que leva un breve prólogo en castelán de Álvaro Cunqueiro. Libro encadrable na temática de poesía da terra, reprodúcese agora nunha coidada edición do profesor Armando Requeixo.

A viaxe. Novas peregrinacións é o título dunha exposición coproducida polo Centro Galego de Arte Contemporánea e o Museo das Peregrinacións en que se presentan os proxectos de Gabriel Díaz, Ignacio Pérez-Jofre e Sophie Whettnall, nos cales os artistas abordan os conceptos de ruta e encrucillada desde puntos de vista diversos. A través das súas obras o espectador decátase de que no camiño nos facemos conscientes das nosas limitacións e do lugar que ocupamos no mundo. Como viaxamos, o que vemos no decurso da viaxe, falan de como somos e de cómo vemos o mundo á nosa volta.

Selección de fotografías feitas por Cristina García Rodero en Grabarka, o centro de peregrinación máis importante da Igrexa Ortodoxa Autocéfala Polaca, que presenta así un documento gráfico cunha beleza estética sorprendente, onde aparecen os numerosos peregrinos portando as cruces ofrecidas como petición ou agradecemento ao Cristo Salvador, seguindo unha tradición que pode remontarse ao século XIII.

Volume publicado con motivo da exposición de Stefan Brüggeman (Cidade de México, 1975) realizada no CGAG e construída a partir de intervencións espaciais que cuestionan a orde dos conceptos, a lóxica das normas e, particularmente, as convencións do sistema. Brüggeman abriu unha maneira diferente de abordar os aspectos sociolóxicos e culturais da linguaxe. O seu traballo incide nesas contradicións lingüísticas que conforman os paradoxos da vida e a convivencia, e pon en cuestión a rixidez do políticamente correcto, precisamente por falso.

Publicación cuxo contido vai dirixido a técnicos sanitarios e persoal de ONG que traballan no campo do VIH-sida, tratando o tema das novas infeccións polo virus da inmunodeficiencia humana e outras infeccións de transmisión sexual, de maneira que se informa sobre o importante cambio que se produce cando este problema sanitario se considera dende a perspectiva de infección e non de enfermidade. Así,  coñecemos as características actuais da epidemia destas infeccións, tanto no que se refire ás persoas afectadas e prácticas de risco como á distribución temporoespacial.

Boletín de periodicidade anual en que se recollen informacións diversas do Instituto Galego das Cualificacións para a súa divulgación.