Catálogo

Volume que recolle medio cento de artigos de colaboradores e colaboradoras para homenaxear ao profesor Anxo Tarrío por mor da súa xubilación. Os ensaios abranguen materias como a historiografía literaria galega, a crítica literaria, a teoría da literatura e a literatura comparada, e asínanos investigadores e investigadoras de toda Galicia, do resto de España e doutros enclaves europeos.
O libro incorpora unha ampla cronobiografía do homenaxeado, complementada por material fotográfico.

Martes de carnaval (As galas do defunto e A filla do capitán) conforma o nº 2 da colección 'O papel do teatro', que dá cabida ás obras levadas á escena polo Centro Dramático Galego. Coeditada pola AGADIC e Edicións Positivas, este Martes de Carnaval, tradución ao galego de dous esperpentos de Valle-Inclán, é o retrato escuro, tráxico e lúcido dun país. Do corazón da gran chafallada nacional xorden os personaxes valleinclanescos, vítimas dunha patria que lles pasa por riba como una apisoadora, e contra a que se rebelan coas únicas armas que lles aprenderon: a extorsión, a mentira e a picaresca.
Non será en absoluto complicado para o público atopar exemplos nos xornais dos últimos anos que sirvan para situar esta historia e comprobar que o esperpéntico espírito nacional non mudou demasiado. Pero ninguén como Valle-Inclán para airear con retranca as nosas miserias a través da súa pluma erudita.

Os golfiños e o xigante, de Inacio Vilariño, conforma o número 14 da colección Barriga Verde, que integra as obras gañadoras dos premios para teatro de monicreques convocados pola Axencia Galega das Industrias Culturais.
Gañadora do XII premio Barriga Verde de textos para teatro de monicreques na modalidade para rapaces (edición 2016), e coeditada pola AGADIC e Baía Edicións, Os golfiños e o xigante conta una viaxe de superación emocionante, na que a protagonista percorre miles de quilómetros na procura do seu obxectivo vital, salvar a vida dos seus golfiños. A través dunha complexa proposta escénica que mestura a técnica de sombras chinesas e o audiovisual, recrea un curioso percorrido en diferentes medios de transporte polas exóticas paisaxes da China.

Marcha fúnebre para un monicreque, de Roi Vidal Ponte, conforma o número 15 da colección Barriga Verde, que integra as obras gañadoras dos premios para teatro de monicreques convocados pola Axencia Galega das Industrias Culturais.
Gañadora do XII premio Barriga Verde de textos para teatro de monicreques na modalidade para adultos (edición 2016), e coeditada pola AGADIC e Baía Edicións, Marcha fúnebre para un monicreque é un experimento revolucionario cheo de voltas, revoltas e reviravoltas que, mediante a linguaxe da farsa, mostra aquilo que normalmente permanece oculto. A acción sitúase nun contexto operístico en chave de humor e misterio e cun marcado carácter metateatral e paródico para conformar un divertimento crítico no que a natureza inerte dos monicreques cobra un simbolismo político.

Textos e adaptacións radiofónicas das obras finalistas do X Premio Diario Cultural de Teatro Radiofónico de 2016.
Trátase dun certame xa ben consolidado e seguido, no que cada ano aparecen nomes novos, cunha achega de calidade e de frescura extraordinarias cara a esta forma dramática, canalizada unicamente co soporte da voz e do son.

Atlas concibido como unha guía para a identificación de parasitos e alteracións patolóxicas durante a observación co microscopio óptico de preparacións histolóxicas. Está estruturado en capítulos que conteñen unha breve introducion e microfotografías dos organismos simbiontes ou alteracións patolóxicas obxecto de cada capitulo . Os tres primeiros capítulos inclúen Procariotas, Protozoos e Metazoos. No cuarto capítulo integráronse outros axentes patóxenos que non pertencen a eses tres grupos, e que son minoritarios. O quinto capítulo recolle alteracións patolóxicas.

Trinta e cinco artigos e textos varios de Isaac Díaz Pardo conforman este número 24 de Cadernos Ramón Piñeiro, prologado e editado por Xosé Ramón Fandiño e cunha coda final de Luís Cochón. As artes plásticas, Sargadelos e outros textos que nos transmiten a súa vida e obra forman parte desta publicación.

Repertorio, resultado dun proxecto bibliográfico elaborado conxuntamente pola Xunta de Galicia e o Ministerio de Educación e Cultura -o Catálogo colectivo do patrimonio bibliográfico-, que recolle os rexistros bibliográficos dos fondos de distintos centros que abranguen o ámbito da produción impresa en Galicia no século XIX. O catálogo está ordenado alfabeticamente por autor persoal, entidade ou primeira palabra significativa do título ou título uniforme e con diversos apéndices e índices que facilitan a súa consulta.

Catálogo dos gravados do gran mestre aragonés que figuran na colección do Museo de Belas Artes da Coruña.

Catálogo da exposición de fotografía de Emmanuel Sougez (1889-1972) realizada no Museo de Belas Artes da Coruña. Trátase dunha figura singular, entregada á fotografía pictórica, con repercusión tamén na crítica de arte.

Boletín científico do Museo de Belas Artes da Coruña. Número monográfico que recolle as conferencias do encontro sobre arte e emocións, celebrado no museo en 2014.

Número sete da revista científica "Ad Limina". Revista de carácter interdisciplinar e internacional, multilingüe, de investigación sobre o Camiño de Santiago e o fenómeno das peregrinacións.