Catálogo

Galardoada co premio XI Barriga Verde de textos para teatro de monicreques na súa modalidade adultos, Ela, piedade dos suicidas, de Xavier Lama, e coeditada pola Agadic e Bahía Edicións, é unha nova visita ao vello mito grego de Orpheo e Eurídice, unha historia órfica de descenso aos infernos na procura da muller idealizada, na que o autor dá conta, en clave poética, do abismo entre a vida e a morte, entre a realidade e o desexo. A vontade transgresora da peza move os marcos do gusto hoxe dominante cunha orixinal mestizaxe de xéneros, pois presenta unha proposta en verso libre, de marcado carácter obxectual, cohabitada por sombras, pantallas, máscaras...

Galardoada co XI Premio Barriga Verde de textos para teatro de monicreques, modalidade infantil, e coeditada pola Agadic e Bahía Edicións, O lobo e a lúa, de Andrea Bayer Lloves, tece unha trama clara e atraente, na que adapta claves de intriga e suspense ao imaxinario dos máis pequenos; unha historia de amizade, superación dos propios medos e de amor que pon en valor, á vez, a singularidade da arte dos monicreques para engaiolar un público familiar.

Volume epistolar, na liña de anteriores achegas a un xénero no que Ramón Piñeiro deixou varios milleiros de mostras, maxistrais algunhas delas. Trátase, neste caso, da revelación da amizade persoal e das relacións profesionais de dous rigorosos intelectuais galegos, personalidades significativas no terreo das humanidades. Introdución, notas aos textos, índices e repertorios bibliográficos son parte desta edición respectuosa cos textos orixinais e ilustrada.

Co título de Cáliz fervendo!, o Centro Ramón Piñeiro presenta unha colectánea de vinte e catro traballos arredor da vida e da obra (co poemario Nimbos, Galaxia, 1961) de Xosé María Díaz Castro, o poeta de Guitiriz do que en 2014 celebramos o centenario do seu nacemento e dedicóuselle o Día das Letras Galegas. Métrica, retórica, estrutura ou temática dos poemas son obxecto de análise por especialistas, coñecedores a fondo de Díaz-Castro. Arcadio López-Casanova, Torres Queiruga, Darío X. Cabana, Olga Novo, Claudio R. Fer e outros prestixian este libro de homenaxe ao intelectual chairego.

Un ano máis, o Centro Ramón Piñeiro para a Investigación en Humanidades, réndelle homenaxe ao persoeiro elixido pola Real Academia Galega para conmemorar o Día das Letras Galegas, do ano 2015 neste caso. Homenaxe concretada nun libro, coordinado por Luís Cochón, que integra un heteroxéneo conxunto de breves estudos, pertencentes a aqueles terreos do saber que Filgueira Valverde, un humanista erudito, cultivou.
Son arredor de trinta estes estudos, rigorosos e anotados, escritos por especialistas, que discorren polos vieiros da historia, a literatura, a biografía, o pensamento e outros asuntos relacionados sempre con Galicia.

Obra coeditada pola Axencia Galega das Industrias Culturais e Edicións Xerais de Galicia dentro da colección Biblioteca Dramática Galega. Galardoada co XXII premio Álvaro Cunqueiro para textos teatrais, na edición de 2014, Raclette, de Santiago Cortegoso, é unha obra que mestura a comedia co dramatismo e aborda temas universais desde a perspectiva da sociedade actual: a incomunicación, a morte, a relación de parella, a maternidade, a sobreprotección ou a violencia.

Obra de Manuel Lourenzo gañadora da XVIII edición do Premio Álvaro Cunqueiro para textos teatrais, coeditada con Edicións Xerais de Galicia dentro da colección Biblioteca Dramática Galega.

Catálogo de arte no que se inclúe un texto que analiza a obra do autor, asi como unha selección de fotografías da súa obra.

Recompilación epistolar con varias ducias de textos enviados por amigos representativos do galeguismo intelectual e literario. A edición é rigorosamente respectuosa cos textos orixinais.Estas cartas permítennos coñecer máis datos da vida e da obra cunqueirá.

Publicación electrónica en liña verbo do Programa galego para a detección precoz de enfermidades endócrinas e metabólicas en período neonatal: obxectivos, características do programa, estrutura organizativa e sistemas de información e indicadores, así como os seus resultados no período 1995-2013.

Boletín electrónico en liña publicado para dar a coñecer aqueles artigos científicos recentes relacionados coa asistencia sanitaria á urxencia e a emerxencia considerados de referencia para os profesionais da sanidade.

Publicación que ten como obxectivo servir de instrumento de mellora da comunicación, útil como referencia e recordatorio, cunha utilidade clara para todos os traballadores do Sergas. No manual recóllense pautas e recomendacións sobre como actuar en determinadas situacións que se dan con frecuencia entre profesionais, pacientes e usuarios nos servizos sanitarios, relacionadas coa atención, o trato e a comunicación efectiva, como comunicarse a través de diversas canles, como xestionar situacións difíciles, recomendacións para a atención a diversos colectivos especiais, breves referencias aos dereitos e valores da institución, así como ao confort, a responsabilidade social e a imaxe corporativa