A guía Pilgrim's guide for medical emergency situations, editada en inglés, inclúe consellos para realizar o Camiño de Santiago, unha guía de primeiros auxilios, mapas que sinalan os puntos de asistencia sanitaria no Camiño Francés e Portugués, e indicacións sobre como porse en contacto co 061 no caso de necesitar asistencia sanitaria.
Folleto no que se expoñen consellos para os peregrinos que realizan o Camiño de Santiago. Tamén inclúe a Tarxeta Sanitaria do Peregrino, os puntos de atención continuada no Camiño Francés e o dispositivo asistencial da Fundación Pública Urxencias Sanitarias de Galicia para o Xacobeo 2010.
Son moitos os artistas contemporáneos -desde Marcel Duchamp ou Man Ray a Andy Warhol- que se revelan debedores das actitudes iconoclastas dos dandis, en tanto que personaxes incómodos e críticos co establishment da arte do seu tempo. A pegada que o dandismo, nas súas múltiples facetas, deixou na arte contemporánea é obxecto de análise desta publicación, concibida polos membros do equipo de curadores formado por Rocío Gracia Ipiña, Sergio Rubira e Marta de la Torriente, como complemento da mostra colectiva Sur le dandysme aujourd'hui. Máis que un catálogo de exposición, este libro é unha monografía que recolle as contribucións de reputados especialistas do campo da historia da arte, a literatura e os estudos culturais sobre a figura do dandi en ámbitos como a moda, a cultura popular, a música pop ou punk ou as artes visuais.
Trátase dun folleto divulgativo dos contidos da visita á "Domus do mitreo" en Lugo, cuxa musealización realizouse no contexto da aparición dos restos dunha domus romana e un mitreo cando se facían as obras de rehabilitación do Edificio Pazo dos Montenegro para sede do Vicerreitorado da Universidade de Santiago no Campus de Lugo. O folleto achega ao visitante ao contexto cultural dos restos e fai unha pequena referencia ao uso das distintas estancias.
O Parque Arqueolóxico da cultura castrexa é unha infraestrutura desenvolvida dentro da Rede Galega de Patrimonio Arqueolóxico, destinada á investigación e difusión do castro de San Cibrao de Las e da cultura castrexa en Galicia. A infraestructura consta dunha zona exterior, na que se atopa o castro, preparado para a visita, e un centro de interpretación onde, mendiante unha montaxe expositiva, explícanse as claves para o coñecemento e comprensión da cultura castrexa e da evolución do castro e das persoas que o crearon e viviron alí. Esta publicación é unha guía de visita para completar a oferta divulgativa do Parque Arqueolóxico e afondar máis no que pode verse na exposición.
O Parque Arqueolóxico da Arte Rupestre é unha infraestrutura desenvolvida dentro da Rede Galega de Patrimonio Arqueolóxico, destinada á investigación e difusión dos petróglifos de Campo Lameiro en Pontevedra. A infraestrutura consta dunha zona exterior preparada para a visita ás distintas estacións de arte rupestre con camiños, zonas de descanso, etc., e un centro de interpretación onde, mediante unha montaxe expositiva, explícanse as claves para o coñecemento e comprensión dos petróglifos e os pobos que os crearon. Esta publicación é unha guía de visita para completar a oferta divulgativa do Parque Arqueolóxico e profundar máis no que pode verse na exposición.
Cumprindo cun designio xa tradicional nesta institución, o de permitir o contacto con universos creativos que transformaron a nosa percepción da arte nas últimas décadas. Este volume sobre o artista italiano Gilberto Zorio é o catálogo da exposición coproducida no ano 2010 polo CGAC e o MAMbo de Boloña. Trátase dunha das publicacións máis completas editadas até agora sobre un dos nomes de referencia da "Arte Povera", cuxo universo creativo contribuíu decisivamente a transformar a nosa percepción da arte nas últimas décadas.
No longo periplo da abstración, de cuxa partida logo fará un século, é constante a súa deriva en dous sentidos opostos e complementarios: ben polo camiño que prima a expresión inmediata, espontánea e directa, ben polo que se orienta segundo o cálculo, o rigor e a norma. Nas dúas últimas décadas, pintores procedentes de tradicións nacionais moi diferentes coinciden, non obstante, nun entendemento común, que sustenta as súas prácticas nunha base racional, que non constitúe nunca un sistema impositivo e pechado, e que se abre ao impulso momentáneo e impensado do artista. O catálogo da exposición Abstración racional reúne obras de catro pintores de distintas nacionalidades que, nin constitúen grupo ou colectivo organizado, nin pretenden facelo: o norteamericano Richard Aldrich, o portugués José Loureiro e os españois Nico Munuera e Juan Uslé.
Jane & Louise Wilson. Tempo suspenso é o catálogo da exposición do mesmo título celebrada no CGAC entre os meses de novembro de 2010 e xaneiro de 2011. No contexto da arte contemporánea, as obras de Jane e Louise Wilson están fóra do común polo seu pronunciado sentido do presente como parte do tempo histórico e, en particular, pola súa preocupación por un sentido concreto do presente europeo como época do final da posguerra. Os seus traballos funcionan internamente de acordo coas formas de conciencia histórica características da cultura literaria, fílmica, radiofónica e televisiva dominante no Reino Unido, aínda que a modulan e a reinverten de modos novos.
Selección de pezas da colección do museo con información catalográfica, imaxes, selección de procesos de restauración e bibliografía, así como textos explicativos, traducido a castelán e inglés.
O catálogo da exposición "Espectral" propón unha relectura dos fondos das coleccións do CGAC a partir da mostra comisaria por Miguel von Hafe Pérez que acolleu o centro compostelán durante o primeiro semestre de 2010. A mostra, que reúne obra de medios tan distintos como o debuxo, a pintura, o vídeo, o gravado e a escultura, ábrese a diferentes perspectivas sobre a memoria como sistema conceptual e perceptivo cuxa recepción a arte consegue densificar.
Con este libro inaugúrase unha serie de publicacións de guías metodolóxicas coas que se pretende contribuír ao coñecemento dos procedementos da arqueoloxía e das súas ciencias auxiliares co obxectivo de servir de axuda na interpretación do rexistro arqueolóxico. A Guía de arqueobotánica ten por obxecto proporcionar orientación sobre os criterios e métodos da arqueoloxía nesta materia, e facilitando directrices e elementos para a recuperación dos materiais orgánicos en contextos arqueolóxicos. Ademais, acompáñase de información complementaria en soporte dixital, formularios e etiquetas, base de datos e informes de diversas actuacións cara a facilitar a planificación dos traballos.
