Catálogo

Nesta terceira entrega do proxecto “Opus monasticorum”, que acomete o estudo e investigación da arte beneditina nos Camiños de Santiago, a análise céntrase no mosteiro de San Xulián de Samos. A recompilación de artigos aborda a historia deste centro monástico e a súa repercusión na arte e na cultura. Nesta obra, a través da contribución de máis dunha ducia de expertos, analízanse polo miúdo aspectos artísticos, arquitectónicos, socioeconómicos e políticos. A publicación inclúe un CD-Rom cun apéndice documental.

Actas do congreso internacional sobre san Rosendo, que se desenvolveu do 27 ao 30 de xuño de 2007 en Mondoñedo, Santo Tirso (Portugal) e Celanova.

Libro-catálogo que acompañou a exposición do mesmo nome presentada en Lugo en 2006. Nel estúdase o movemento irmandiño, a sociedade galega do século XV, a arte do momento, as peregrinacións a Santiago etc., a través dos seguintes apartados: “Vida cotiá e vivencia do alén”, “Encrucillada no Atlántico”, “A gloria do Señorío”, “Tesouros e reliquias”, “Gorrións contra falcóns” e “Imaxes de peregrinación”.

Catálogo en galego/castelán/inglés onde se recolle a oferta de libros infantís e xuvenís producidos en Galicia durante o ano. Inclúe a descrición dos volumes, a reprodución en color das cubertas e a información editorial necesaria para identificar cada obra.

Guía técnica, publicada en liña, que recolle pautas de actuación na inspección de equipos eléctricos nas zonas clasificadas con risco de explosión.

Publicación electrónica en CD, que recolle o traballo centrado en identificar e analizar os criterios e procedementos empregados para a priorización de tecnoloxías sanitarias no nivel nacional/internacional, co fin de establecer criterios universais e enfoques prácticos que poidan servir de base para o desenvolvemento dun marco de priorización para o SNS.

A publicación Preguntas reais ou preguntas retóricas recolle as distintas reflexións sobre os criterios que deben guiar as actuacións dos servizos de actividades e proxectos educativos dentro do marco dos museos e centros culturais, conclusións froito das charlas dos especialistas que participaron nas xornadas e encontros de educación artística realizadas no Centro Galego de Arte Contemporánea e no Centre Civic Sant Andreu en maio do 2006.
 

María José García Blanco é a responsable desta nova edición da tradución a castelán do Códice Calixtino, presentada en 1951 polos profesores A. Moralejo, C. Torres e J. Feo, e reeditada pola Xunta de Galicia en 1993, 1999 e 2004. A profesora García Blanco xa participara con J.J. Moralejo na revisión de 2004. Preséntase agora unha nova edición revisada e corrixida, que inclúe novos rexistros bibliográficos.

Edición actualizada da guía do conxunto patrimonial do Museo e o Castro de Viladonga, elaborada polos servizos técnicos do Museo baixo a dirección do centro, estruturada en catro capítulos que se corresponden coas salas de exposción permanente; feita nos dous idiomas oficiais de Galicia e acompañada dos textos en alemán, francés e inglés. Ademais de destinarse á venda ao público, a publicación servirá para os intercambios bibliográficos que estableceu o Museo con institucións similares, o que supón un notable incremento da súa biblioteca auxiliar especializada.

Obra que resume o proceso de romanización en Bueu e contextualízaa na península do Morrazo e na Galaecia romana. A base para iso son as escavacións realizadas nesa localidade hai uns anos dunha factoría de salgaduras e uns fornos romanos. Os datos extraídos e os materiais arqueolóxicos permiten engarzar cunha parte importante do discurso do Museo Massó cuxa orixe se encontra nunhas fábricas de conservas contemporáneas. Publicación ilustrada con fotografías, debuxos e mapas con carácter divulgativo.

Publicación electrónica en liña dirixida a todas as persoas profesionais do ámbito da nefroloxía. Descríbe a epidemioloxía da enfermidade renal terminal e os seus tratamentos, tanto a diálise coma o transplante na Comunidade Autónoma de Galicia. Así mesmo, recolle os datos correspondentes a 2013 e a evolución dos últimos anos.

Catálogo correspondente á exposición conmemorativa da entrega da doazón de 93 obras de arte por dona Carolina González Abad, no seu nome e no do seu marido, don Manuel Santiago Blanco, a favor da Xunta de Galicia, para a súa exposición, estudo e custodia no Museo de Belas Artes da Coruña.