Catálogo

Catálogo da exposición: José Guitián. Fotógrafo en Compostela. 1950-1980. Con textos de Manuel F. Rodríguez e José Seijo Guitián. Recóllese unha ampla selección da obra fotográfica deste autor, recuperada para realizar a exposición e este catálogo, con imaxes na súa maioría inéditas. Coa súa cámara e durante corenta anos de traballo, José Guitián retratou Santiago e a súa veciñanza. As súas fotografías son hoxe un testemuño da vida compostelá durante estas catro décadas.

Catálogo da exposición, enmarcada nos actos conmemorativos do 400 Aniversario do Colexio de San Clemente, que recolle as obras de 29 artistas que tiñan como nexo a súa vinculación con este centro de ensino por ser nalgún momento profesores ou alumnos seus. Asorey, L. Garabal, Vidal Abascal, López Carballo ou Sevillano son algúns dos nomes aquí representados.

Novidoso libro colectivo, que celebra a escenificación do drama litúrxico "O Misterio de Elche" na igrexa compostelá de San Martiño Pinario. Con prólogo de Vicente Molina Foix e coordinado por Francisco Singul, nel participaron investigadores, historiadores e filólogos de varias universidades, nun conxunto de textos que forman unha sorte de fusión da cultura da "Festa" (Misteri d'Eltx) e o legado patrimonial do Camiño de Santiago.

Obra que recolle, de forma documental e gráfica, unha década de obras nos Camiños de Santiago en Galicia, que abrangue desde a rehabilitación de edificios para acondicionalos como albergues para peregrinos ata a construción doutros de nova planta para desempeñar a mesma función, e que conforman a Rede Pública de Albergues da S.A. de Xestión do Plan Xacobeo. Esta publicación foi seleccionada para os Premios de Deseño Editorial Daniel Gil, 2004.

Libro catálogo da exposición “Compostela. Camino de Santiago. Luz y vida”, que se presentou con motivo da celebración do Ano Xacobeo 2004. Os fotógrafos Tino Martínez e Vari Caramés ofrécennos, a través da súa particular visión, diferentes imaxes de lugares emblemáticos de Compostela, acompañados da palabra doutra relevante autora galega, Marina Mayoral.

Libro resumo da exposición Camiño de Paz. Mane Nobiscum Domine, que tivo lugar na catedral de Ourense no 2005, con motivo da celebración do ano dedicado polo papa Xoán Paulo II á Eucaristía. A mostra facía un percorrido pola historia e a arte de Galicia, en conexión co resto de Occidente, para evidenciar así a pegada do legado evanxélico na creatividade cultural galega, a través de pezas de ourivería, escultura, pintura, etc.

Libro-catálogo da exposición celebrada en Compostela no ano santo de 2004 que, ademais do catálogo de obra da mostra, recolle estudos de recoñecidos autores de España, Italia e Portugal sobre a figura do príncipe Cosme III de Médicis e a súa visita a Compostela, en 1669. A través das súas páxinas coñeceremos a España que percorre, reflectida nas magníficas acuarelas de Pier Maria Baldi, a arte florentina da época, a música, a lingua, etc.

Libro-catálogo da exposición 'Galitzia en Galicia. A arte de Cracovia e a Pequena Polonia', que nos introduce na arte polaca, con obras procedentes do Museo Nacional de Cracovia e de varios conventos e igrexas da zona. A estrutura da mostra era a que segue: arte sacra e artesanía artística (desde o Románico ata o século XVIII), cadros e esculturas (ss. XIX e XX), e obras de tres artistas de vangarda: Witkacy, Bruno Schultz e Tadeus Kantor.

Memoria do ano xacobeo 2004, que recolle todos os eventos realizados dentro e fóra de Galicia con motivo do primeiro ano santo compostelán deste milenio: congresos, seminarios, exposicións, publicacións, concertos, etc.

Libro promocional do Xacobeo 2004, no que se fai unha pequena aproximación á figura de Santiago o Maior. Comeza por amosarnos quen é o apóstolo, para continuar coa pegada do culto xacobeo en terras de Europa, España e Portugal, e culmina cunha análise de Compostela e da súa catedral. Todo iso a través de textos de autores xa clásicos dentro do mundo xacobeo, como Vicente Almazán, Robert Plötz, etc.

Os fotógrafos Tono Arias, Juan Rodríguez, Tino Martínez, Vari Caramés e Xurxo Lobato ofrécennos a súa visión do Camiño de Santiago e mais da propia cidade do apóstolo nesta obra colectiva que, amais das súas instantáneas, se completa cos textos das recoñecidas escritoras Ana Romaní, Marina Mayoral, Luisa Castro e Yolanda Castaño.

Libro de divulgación sobre o Camiño de Santiago publicado no ano santo 2004, a partir dunha idea orixinal de Albert Moré. A cuberta procede dunha obra de Antoni Tàpies creada expresamente para outra versión do libro, de gran formato, cuberta de tea e con estoxo. A dirección científica e os textos son de José Manuel García Iglesias.