Catálogo

Catálogo da exposición “Orinoco. Viaxe a un mundo perdido”. Neste catálogo quérese dar unha aproximación aos contidos da exposición a través de textos relativos ao tema: a Colección Orinoco, as tribus indíxenas, a morfoloxía dos territorios entre ríos e a actividade propia do medio fluvial. Ademais, móstrase unha selección dos obxectivos máis representativos da Colección presentes na exposición. O libro é trilingüe, galego, castelán e inglés.

Catálogo da exposición "José Suárez. Ollos vivos que pensan" con amplios textos de estudo dos comisarios e especialistas en fotografía. O catálogo é a obra máis completa ata o momento da vida e a obra do fotógrafo José Suárez, e incorpora unha gran cantidade de material inédito referente á súa vida.

Catálogo da exposición Camiño (A orixe), con textos dos membros do comité asesor, máis 7 textos de estudo sobre temas relacionados co Camiño e 150 imaxes correspondentes ás obras expostas.

Catálogo da exposición "Pensar coas mans. Cestería, cerámica e xoiería de Galicia", que mostra un percorrido pola historia da artesanía galega desde a prehistoria ata os nosos días.

Catálogo da exposición "Auga doce. Agua dulce", con textos do comité científico da exposición, texto de Gabriel García Márquez e texto introductorio descritivo da exposición. Selección de 220 imaxes de obras da exposición.

Catálogo da exposición Flor Novoneyra, na que se representa o diálogo entre a obra de Antón Lamazares e a poesía de Uxío Novoneyra a través de 160 pezas de Lamazares, inspiradas nos versos do poeta.

Catálogo da exposición "Galicia universal. Arte galega nas coleccións Abanca e Afundación".

Catálogo da exposición "Castelao maxistral", que ten como eixo o cadro de Castelao "A derradeira leición do mestre". Nos contidos inclúense os debuxos de Castelao relacionados coa escola e educación e a situación das escolas en Galicia no primeiro terzo do século XX.

Primeira monografía editada en español sobre a artista escocesa Susan Philipsz. Con motivo da súa exposición no Centro Galego de Arte Contemporánea presentamos unha compilación das súas obras relacionadas cos temas da ausencia, a perda e a morriña. Os textos reunidos nesta edición fan dela unha ferramenta fundamental para comprender a traxectoria da artista, así como as últimas tendencias en experimentación sonora en formatos de exposición.

A exposición de Cristina García Rodero "Transtempo", organizada polo Xacobeo en colaboración co Centro Galego de Arte Contemporánea, presenta unha serie de obras realizadas pola fotógrafa desde os anos setenta até a actualidade. Esta obra, coeditada pola Xunta de Galicia e a editorial La Fábrica, reúne unha selección das pezas máis destacadas que constitúen esa mostra con textos de Miguel von Hafe Pérez, Rosa Martínez e Manuel Rivas.

Manfred Gnädinger (Radolfzell, 1936-Camariñas, 2002), máis coñecido como Man de Camelle, foi un creador polivalente que desenvolveu o conxunto do seu labor en Camelle (Camariñas), totalmente á marxe do sistema artístico. Ao longo da súa vida dedicouse a integrar obxectos que o mar lle traía no contorno do seu xardín, formando esculturas e conxuntos artísticos en constante evolución que deron forma ao seu museo. O seu legado deixóunolo en forma de proxecto museográfico, seguindo un proxecto totalmente innovador, no que se plasmaban conceptos moi actuais sobre xestión, difusión e divulgación museística. Sistematizouno nun compendio de 606 fotografías, debuxos e escritos denominado "Museum vom Einsiedler Man". Camelle (A Coruña) Spanien, no que se recolle a esencia da súa creación artística entre os anos 1969 e 1978.

O proxecto expositivo "Work (always) in progress" formula un discurso secuencial que permite abordar os principais aspectos do traballo de Pedro Cabrita Reis (1956) a través de series representativas como Compounds, Favorite Places, True Gardens ou Floresta nun arco temporal que percorre tres décadas. A mostra articúlase por medio dunha trintena de obras que ocupan o vestíbulo e as plantas baixa e primeira do CGAC, xunto con intervencións site specific no exterior do edificio. As obras reunidas dan conta da súa extensa produción artística, que evidencia o potencial dialéctico do seu traballo, entre referencias a principios construtivistas e procesuais, cuestións formais minimalistas e o uso prominente do obxecto preexistente.