Catálogo

Documento editado en 2013. En 2016 realízase unha edición en papel porque este documento recolle as expectativas e desexos da xestante e a súa parella sobre o parto e nacemento do seu fillo ou filla, polo que, para favorecer a participación da muller na toma de decisións informadas durante o proceso de parto, cómpre entregar por escrito esta información, para que ela deixe tamén por escrito a súa decisión e se teña en conta por parte dos/as profesionais que a atenderán durante o parto e puerperio, sempre que o desenvolvemento do proceso sexa normal.

O Programa de asistencia ao ictus en Galicia (Plan ictus), ao nivel de toda a nosa comunidade autónoma, permitirá unha atención de calidade, homoxénea e rápida e baseada na coordinación.
O obxectivo é que ás persoas pacientes con sospeita de ictus isquémico -independentemente do lugar no que se atope dentro do territorio da nosa Comunidade Autónoma- se lles realice unha exploración radiolóxica para confirmar o diagnóstico o antes posible e poder aplicar o tratamento máis axeitado, conforme ás recomendacións e tempos establecidos.

Instrución que recolle os obxectivos a acadar na campaña 2016, así como os aspectos técnicos relacionados coas vacinas que se van utilizar, e outra información relativa a súa xestión, distribución e rexistro das doses. Vai dirixida a todos os profesionais sanitarios dos puntos de vacinación (públicos e privados) que participan nela.

Memoria da Oficina de Coordinación de Transplantes correspondente ao ano 2015. Recolle a actividade da oficina e dos hospitais galegos referida á doazón e ao transplante tanto de órganos como de tecidos.
Tamén recolle os datos do programa de garantía de calidade na doazón e transplante e detállanse os centros autorizados para extracción e o implante de órganos e tecidos, así como os establecementos de tecidos.
En canto á oficina, descríbense as actividades desenvolvidas por ela, así como os obxectivos para o vindeiro ano.

Estudo co que se pretende optimizar o actual Banco de Produtos de Apoio de Galicia. A elaboración desta enquisa responde á necesidade de dispor dunha base de coñecemento que permita desenvolver accións específicas coas que acadar o obxectivo marcado: determinar a percepción e a valoración dos produtos de apoio máis coñecidos e demandados polas federacións e asociacións que serven de apoio ás persoas con discapacidade e ás súas familias.

Boletín que presenta o novo medicamento Insulina Glargina Biosimilar, nova insulina para o tratamento da diabetes mellitus en adolescentes e nenos, a partir dos dous anos de idade. Tamén se identifica o lugar que ocupa no tratamento da enfermidade e informa de que a chegada dos biosimilares xera unha competencia no mercado de medicamentos biolóxicos que conduce a unha redución nos custos de adquisición, o cal libera recursos do sistema sanitario.

O Programa de vixilancia sanitaria das zonas de baño realízase na Comunidade Autónoma de Galicia desde o ano 1983. Trátase dun programa que realizan todas as comunidades autónomas, coordinado polo Ministerio de Sanidade, Servicios Sociais e Igualdade, desde o ano 1988.
Na nosa comunidade autónoma, a tempada de baño establécese, en función das condicións climatolóxicas, desde o 1 de xuño ao 30 de setembro, aínda que a primeira recollida de mostras se realiza na segunda quincena de maio.
As mostraxes realízanse cunha frecuencia quincenal, de tal modo que ao final da tempada se teñen, polo menos, 8 controis, que son os necesarios para calcular a clasificación sanitaria das zonas de baño.
Os parámetros controlados son os que indica a lexislación vixente (Real decreto 134112007, do 11 de outubro, sobre a xestión da calidade das augas de baño).
Cos resultados obtidos en cada tempada elabórase o Informe Técnico do programa de vixilancia sanitaria das zonas de baño de Galicia.

Documento editado en 2012. No ano 2016 realízase esta nova edición, na que se elimina o parágrafo: "Para consultar sobre cuestión relativas a causas, riscos e prevención de defectos conxénitos, pode chamar gratuitamente ao Servizo de Información telefónica da embarazada (SITE): 913942589 de Madrid", das páxinas 21 e 29, porque este servizo xa non se presta.
Esta edición faise en papel, porque este documento recolle os datos das consultas prenatais: información que é necesario que posúa a xestante nos seus desprazamentos, por se precisa asistencia médica.

Boletín de actualizaciones bibliográficas en urgencias prehospitalarias nº 6, editado pola Comisión de Investigación da Fundación Pública Urxencias Sanitarias de Galicia-061. Presenta as últimas novidades no campo da urxencia e a emerxencia sanitaria na atención extrahospitalaria.

Boletín informativo de periodicidade bimestral elaborado pola Sección de Publicacións e Estatísticas da Secretaría Xeral Técnica da Consellería de Política Social. Estrutúrase en varias seccións: Actualidade, Estatísticas, Alertas e Normativa, e ten como principal obxectivo informar sobre as actuacións máis salientables da Consellería no seu ámbito competencial e a información e formación dos seus usuarios.

A norma que regula a responsabilidade penal dos menores (Lei orgánica 5/2000) pon o acento nas funcións rehabilitadoras e reeducadoras máis que nas sancionadoras. Establece un catálogo de medidas de natureza sancionadora-educativa que, baseado no superior interese do menor, persegue a integración e a reinserción social dos/as menores que delinquen. Esta memoria recolle os datos estatísticos de execución relativos ao ano 2015 e preséntase dividida en seis bloques: Medidas notificadas polos xulgados de menores, Medidas en execución, Medidas pendentes de execución, Datos sobre as persoas menores que estiveron executando medidas e Actuacións no ano 2015. Acompaña á publicación un anexo cun resumo do programa de traballo remunerado e formación ocupacional de menores infractores que cumpren unha medida de internamento nun centro.

Protocolo de actuación ente casos de mulleres en situación de violencia de xénero, dirixido a profesionais da sanidade, no que se indica que actuación deberá levarse a cabo segundo o caso de que se trate, a partir dun fluxograma de decisión que aparece na primeira páxina. Consta dun fluxograma de decisión en caso de sospeita de violencia de xénero, definición e tipos de maltrato, pautas de actuación na consulta, como cubrir un parte de lesións, datos de interese e bibliografía.