Catálogo

O Observatorio Galego de Dinamización Demográfica inicia, coa publicación deste primeiro dossier Mobilidade e migracións en Galicia, a colección de monografías temáticas que o Plenario do observatorio tivo a ben aprobar na sesión do 29 de novembro de 2023. Nos anteriores informes deste observatorio sobre a situación demográfica de Galicia, de 2018 e 2023, a análise dos movementos migratorios ocupa un lugar destacado en consonancia, por unha parte, coa nosa propia historia migratoria e, de maneira particular hoxe en día, coa preocupación por afondar no seu significado no contexto dun acusado cambio poboacional e social.

Este atlas mostra o resultado da análise da información recompilada polos observadores da Unidade Técnica de Pesca de Baixura (UTPB) da Consellería do Mar no período 2000-2018 xunto coa serie histórica da actividade da frota rexistrada nas bases de datos oficiais da administración pesqueira galega.
O atlas componse de dúas seccións; a primeira está dedicada ás vinte modalidades de pesca principais utilizadas pola frota de baixura galega, a segunda sección trata sobre os recursos pesqueiros capturados pola frota nas costas de Galicia.

A Táboa Input-Output Pesca-Conserva Galegas 2019 é unha ferramenta análitica básica para o coñecemento da estrutura produtiva dos sectores da pesca, industria conserveira, marisqueo e miticultura.
Nela ponse de manifesto o peso relativo das diferentes ramas produtivas, as relacións existentes entre os diferentes sectores, os seus vínculos con outras áreas económicas, a orientación da produción cara a outros sectores, ou cara ao consumo final. Todo isto a través das matrices básicas de calquera táboa inputs-intermedios, matriz de inputs primarios, matriz demanda final e matriz de coeficientes técnicos, aos que lles engade unha matriz de intermediarios e unha composición bruta de capital fixo.

A proposta de libro en esta ocasión, seguindo a idea orixinal de tratar por separado cada un dos filos animais presentes en augas de Galicia, está dedicado aos Nemertinos. O libro trata de ofrecer unha ferramenta visual de identificación de estos animais sumamente interesantes, pero que, en xeral, son moi descoñecidos. As especies que o compoñen non presentan un valor comercial, ainda que que si un elevado valor ecolóxico, estando presentes en multitude de hábitats diferentes e moitas veces en grandes cantidades. Mediante fotografías realizadas no seu hábitat natural, as especies coñecidas en Galicia son caracterizadas de maneira detallada, o que permite que o libro poida ser de utilidade para toda persona interesada, tanto profesional como aficionada, desde biólogos, educadores cientificos, mergulladores curiosos, pescadores e ata calquera que da maneira ocasional goste de achegarse a observar as zonas intermareais.

Os platelmintos están considerados por moitos autores como os animais bilaterais máis primitivos coñecidos. As especies aquí descritas, especialmente as pertencentes á orde Polycladida non só completan o coñecemento da fauna de invertebrados de Galicia, senón que tamén da biodiversidade e distribución desta orde na súa totalidade. Moitas das novas citas teñen un carácter fortemente cosmopolita e outras considerábanse endémicas do Mediterráneo ata a data, sen esquecer a contribución ao coñecemento xeral da biodiversidade deste taxón, grazas á descrición de novas especies. Por tanto, a contribución deste libro ao coñecemento dos policládidos, en xeral e, en particular, para os da Península ibérica pódese considerar decisiva.

O coñecemento sobre a recuperación de zonas produtivas de moluscos aínda é moi escaso e hai moita marxe para seguir adiante coa innovación e mellora; isto é especialmente certo para o caso do berberecho común. O presente documento pretende sinalar as pautas e os puntos clave, con base no nivel de coñecemento actual, que considerar no deseño e execución dun programa deste tipo. Non se trata en absoluto dun documento pechado, senón que cumprirá ir actualizándoo na medida en que se vaian abordando experiencias.

Informe elaborado polo Observatorio Galego de Dinamización Demográfica, coordinado por María Xosé Rodríguez Galdo e aprobado polo Pleno do Observatorio en novembro de 2023. O informe analiza de forma extensa ao longo de seis capítulos os aspectos fundamentais da situación demográfica de Galicia, tendo unha parte final dedicada a unha análise DAFO-CAME e varios Anexos.
Consonte coa misión do Observatorio téntase achegar unha resposta a preocupación polas dinámicas demográficas non só dos xestores públicos e privados senón tamén dun cada vez máis amplo sector da cidadanía galega. Quérese avanzar na interpretación e alcance dos comportamentos demográficos, evitando as visións curtopracistas .
Un Informe das características do aquí presentado nútrese en boa medida das fontes de datos e indicadores elaborados polo IGE (Instituto Galego de Estatística) e polo INE (Instituto Nacional de Estadística), e tamén da recompilación das distintas series elaboradas por consellerías e organismos da Xunta de Galicia e por entidades provinciais e locais así como por diversos organismos ministeriais do Goberno de España. Da súa utilización, e da inclusión puntual dalgunha outra fonte de datos como Eurostat, dáse conta nos distintos epígrafes.

Este libro tenta ofrecer unha simple ferramenta visual de identificación destes rechamantes moluscos pertencentes á orde Nudibranchia, coñecidos popularmente como lesmas de mar ou nudibranquios, mediante fotos realizadas no seu hábitat natural, a toda persoa interesada, tanto profesional como afeccionada, desde biólogos, educadores científicos, mergulladores curiosos, mariñeiros ou ata simples observadores das pozas intermareais.

O libro Esponxas mariñas de Galicia é unha obra divulgativa e de consulta especializada, que pretende achegar a fauna mariña da nosa comunidade dunha maneira nova, isto é, mostrando os animais da maneira na que se atopan no medio natural. As descricións incluídas na obra son o resultado de máis de 10 anos de estudo e recollida de datos que permiten achegar información suficiente como para que calquera persoa que teña interese poida achegarse a este grupo de animais tan descoñecido e, tradicionalmente, só ao alcance dos especialistas. O libro contén información sobre máis de 220 especies de esponxas, acompañadas de máis de 520 fotografías submarinas a toda cor, que complementan as descricións e achegan detalles importantes para a identificación.

Informe elaborado polo Observatorio Galego de Dinamización Demográfica, coordinado por María Xosé Rodríguez Galdo e aprobado polo Pleno do Observatorio en xullo de 2018. O informe, estruturado en dúas partes, analiza polo miúdo os procesos do cambio demográfico en Galicia, polo que adquire especial relevancia a inclusión de todos aqueles aspectos relacionados coa súa modernización social e demográfica (roles de xénero, estruturas familiares, seguridade ante a morte, aumento do capital humano, produtividade do traballo, relacións interxeracionais etc.). Esta primeira parte remata con anexos con informes, estatísticas e referencias que completan e amplían a información.
Na segunda parte, e baseándose na metodoloxía DAFO-CAME, analízanse e detéctanse as debilidades, ameazas, fortalezas e oportunidades que, en materia demográfica, afectan a Galicia.

O Observatorio Galego de Dinamización Demográfica elaborou este informe que presentou ao Parlamento de Galicia en xaneiro de 2021 no que se fai unha diagnose da nosa dinámica poboacional. Este informe complementouse cun segundo documento co título Galicia perspectivas demográficas, (Segunda parte.-Análise DAFO e CAME) que buscaba ofrecer unha serie de conclusións axustadas á realidade demográfica de Galicia. No citado traballo quedou patente que Galicia, como o conxunto de España, completou hai décadas o seu proceso de transición demográfica e segue a estar inmersa na serie de transformacións características da segunda transición demográfica ligada ao incremento da mobilidade e a importantes cambios sociais, económicos e de valores. Neste contexto de profundas transformacións sitúase a pandemia da Covid-19 con indicadores de recesión que non se coñecían desde hai moitas décadas.
O informe reflexiona sobre a necesidade de que este cambio non pode ser puramente tecnolóxico, senón que ten que ir acompañado dun cambio educativo e cultural, como se reclama desde moi diversas instancias.

Despregable que, a través de mapas, gráficos, fotografías e textos, recolle os albergues públicos da Xunta de Galicia ao longo de todas as rutas xacobeas da Comunidade. Inclúe tamén información sobres as normas de uso, prazas, horarios, prezo etc.