Crioterapia para la prevención de la neuropatía periférica secundaria a quimioterapia: Dispositivo para el enfriamiento de manos y pies

O cancro de mama é unha enfermidade de grande impacto no sistema sanitario. O programa de detección de tecnoloxías novas e emerxentes do Ministerio de Sanidade busca priorizar tecnoloxías que melloren o manexo desta doenza. O uso de marcadores metálicos na disección axilar dirixida (DAD) seleccionouse como unha tecnoloxía nova que permite extraer selectivamente tecido axilar afectado. Como resultado da extracción selectiva redúcense os efectos secundarios e mellórase a calidade de vida das pacientes. A evidencia publicada sobre os marcadores metálicos describe unha taxa de falsos negativos inferior ao 10 %, límite marcado polos expertos para o emprego da DAD. Sería necesaria a súa avaliación comparativa co sistema actualmente utilizado para coñecer a súa seguridade e efectividade relativas.

A radioterapia Lattice é unha modalidade de radioterapia espacialmente fraccionada que administra doses heteroxéneas en tumores profundos, voluminosos, metastásicos ou irresecables, combinando áreas de alta e baixa dose. A evidencia dispoñible procede principalmente de series de casos e un estudo transversal, sen comparacións coa radioterapia convencional. Os resultados suxiren posibles reducións do volume tumoral, respostas parciais ou completas e alivio de síntomas, con eventos adversos maioritariamente leves. Con todo, debido ao deseño metodolóxico dos estudos, a certeza da evidencia é moi baixa. Ademais, a súa implementación clínica require formación específica, planificación complexa e protocolos estandarizados. Aínda que os datos preliminares son prometedores, a efectividade e seguridade a longo prazo son incertas.

Non existe evidencia do uso da campá de baleiro no tratamento do pectus excavatum (PE) en pacientes menores de 18 anos en comparación coa corrección cirúrxica mínimamente invasiva (MIRPE). Así mesmo, tampouco se estableceu a súa efectividade en comparación con outras intervencións, como a fisioterapia respiratoria ou medidas estándar de coidado do PE. Por outra parte, en pacientes demasiado novos para se someteren a cirurxía, ou que a rexeitan, a evidencia está limitada a un único estudo de baixa calidade con resultados moi modestos, o cal impide determinar con certeza a súa efectividade real. Aínda que o dispositivo pode considerarse seguro, notificáronse acontecementos adversos de escasa entidade asociados ao seu uso.

O cancro de mama é o máis frecuente entre as mulleres e a principal causa de morte por esta enfermidade. A radioterapia intraoperatoria (RIO) consiste en aplicar unha única dose de radiación directamente na área do tumor durante a cirurxía. Este informe analiza como de efectiva e segura é esta técnica para previr recaídas e mellorar a calidade de vida, en comparación coa radioterapia tradicional. Os estudos revisados indican que a RIO presenta máis risco de recaídas que a radioterapia externa, pero causa menos efectos secundarios e pode achegar maior benestar ás pacientes. A pesar da súa comodidade, aínda precisa máis evidencia para confirmar a súa efectividade a longo prazo.

Informe de avaliación sobre a eficacia e seguridade da nutrición enteral oral domiciliaria con suplementos nutricionais orais (SNO) en pacientes con cancro en tratamento activo e con desnutrición moderada-grave. A limitada evidencia localizada non é concluínte sobre o uso dos SNO na mellora do estado nutricional, a taxa de mortalidade ou supervivencia e a calidade de vida, nin se reduce a estancia hospitalaria. A aceptabilidade dos SNO é dispar e parece estar directamente relacionada co grao de implicación dos profesionales sanitarios.

Os miomas uterinos son tumores benignos da parede do útero que poden causar problemas importantes como o sangrado uterino anormal ou menstrual abundante, presión ou dor na pelve e efectos na reprodución.
Avalia-t realizou este informe co obxectivo de determinar a efectividade e seguridade clínica da ablación por radiofrecuencia (ARF) no tratamento dos miomas uterinos sintomáticos en mulleres que desexan conservar o útero. A pesar de que a evidencia amosa unha seguridade aceptable, a falta de estudos comparativos non permite establecer conclusións definitivas sobre o beneficio-risco da ablación por radiofrecuencia.

O obxectivo dun programa de cribado neonatal (PCN) é o diagnóstico e tratamento precoz dos acabados de nacer afectados por unha enfermidade hereditaria e sempre antes de que se manifesten os síntomas da enfermidade, para evitar e/ou reducir a mortalidade e as posibles discapacidades. Para incluír unha enfermidade nun PCN debe cumprir uns requisitos esenciais e ofrecer un claro beneficio en saúde no neno que acaba de nacer. Neste traballo analízanse 3 enfermidades conxénitas: a enfermidade da urina con cheiro a xarope de pradairo, a acidemia isovalérica e a homocistinuria. Os resultados do informe indican que o cribado neonatal de calquera das enfermidades estudadas non mostra un claro beneficio na redución da mortalidade ou na mellora do prognóstico e que a proba se asocia cun gran número de resultados falsos positivos.

O obxectivo deste documento consiste en avaliar de forma comparada a seguridade e efectividade clínica da ablación térmica por láser e por radiofrecuencia no tratamento dos nódulos tiroideos benignos sólidos sintomáticos fronte ao tratamento habitual (cirurxía convencional ou vixilancia activa).

O cancro de tiroides desenvólvese nos tecidos da glándula tiroides. O tratamento estándar é a cirurxía; con todo, en pacientes con altos riscos cirúrxicos (pacientes deteriorados ou con varias intervencións) ou que non queren operarse, deben buscarse outras alternativas. Os procedementos minimamente invasivos como son a ablación por láser (LITT: láser intersticial terapia tumoral) ou a ablación por radiofrecuencia (RF) poden ser unha das alternativas. O obxectivo deste informe é avaliar, mediante revisión sistemática, o tratamento do cancro recorrente de tiroides mediante ablación por láser ou radiofrecuencia en relación coa súa efectividade e seguridade fronte á cirurxía como terapia estándar.

O obxectivo deste documento é avaliar mediante revisión sistemática o implante AqueSys Xen-45 para o tratamento do glaucoma primario de ángulo aberto (GPAA) en relación coa súa efectividade e seguridade fronte á terapia estándar (trabeculectomía).