Preguntas frecuentes

Este portal reúne as publicacións editadas pola Xunta de Galicia dende o ano 2005 ata a actualidade e dá acceso á súa adquisición, descarga ou localización no catálogo da Rede de Bibliotecas de Galicia. 

Podes facer uso do buscador da portada ou, se necesitas orientación sobre a busca, podes acceder directamente a "O catálogo", onde dispoñemos dun buscador avanzado que permite combinar diferentes criterios: palabras do título ou da sinopse, nome dos/as autores/as, ano de edición, temática, tipo de publicación, lingua, dispoñibilidade para a compra etc. Ademais, ofrecémosche as nosas propias suxestións para descubrir títulos dos nosos fondos.

A Libraría ofrece estas tres opcións:

• A descarga gratuíta no formato dixital máis axeitado, que pode variar segundo o caso: pdf, epub, zip, mp3 etc.
• A adquisición de exemplares de publicacións venais e non venais. Xunto co prezo da publicación, a persoa compradora ten que facerse cargo dos gastos de envío. No caso de publicacións non venais que estean dispoñibles para a súa distribución, pódense obter pagando só os gastos de envío.
• A localización das publicacións no catálogo das bibliotecas públicas dependentes da Dirección Xeral de Cultura, que inclúe a Biblioteca de Galicia, as bibliotecas públicas xestionadas pola Xunta de Galicia, bibliotecas públicas municipais, bibliotecas especializadas dependentes da Xunta de Galicia (de arquivos e de museos) e bibliotecas especializadas con diferentes temáticas (a do Consello da Cultura Galega, a da Filmoteca de Galicia e a do Centro Galego de Arte Contemporánea). A ficha de cada publicación inclúe unha ligazón a unha busca automática nese catálogo, o que che permite localizar exemplares da publicación do teu interese nas bibliotecas.
   

O apartado “Novidades” deste portal inclúe as últimas publicacións que a Xunta vai editando e incorporando á Libraría. Se che interesa un tipo de publicación en concreto (dunha determinada temática, por exemplo), podes configurar alertas personalizadas que che permitirán recibir avisos na túa conta da web ou no correo electrónico cada vez que apareza algunha publicación nova que cumpra eses criterios. 

As alertas personalizadas permiten recibir avisos cada vez que se engada ou se modifique no catálogo unha publicación do teu interese. Para crealas, tes que entrar en "A miña conta", na pestana de configuración das alertas. Nese panel poderás establecer os criterios que consideres: por palabras clave, temática, tipo de publicación ou dispoñibilidade. Dende ese mesmo apartado poderás consultalas, actualizalas ou eliminalas en calquera momento.

Todas as publicacións do catálogo da Libraría dispoñen da icona dunha estrela. Se premes sobre ela, gardarase automaticamente na túa conta, na pestana de publicacións favoritas.

Para comprar publicacións na Libraría Institucional é imprescindible que te deas de alta como usuario/a. As publicacións que se poden mercar son as que teñen na súa ficha a icona do carro da compra. Ao premer sobre esa icona, engádense directamente ao teu carro, que podes consultar ao premer sobre a icona do carro do menú principal. Dende a páxina á que accedes podes actualizar a listaxe de publicacións e mais tramitar a compra, que se realiza en 3 pasos: 

• Información do pedido
• Revisión
• Pagamento

O pagamento realizarase a través da Oficina Virtual Tributaria da Xunta de Galicia. Os métodos de pagamento aceptados son os indicados no apartado “Taxas e prezos” da súa web. 

Actualmente só é posible realizar envíos a España (Península, Ceuta e Melilla, Baleares e Canarias).

Os gastos de envío varían en función do peso do pedido: 

• 2 € (IVE incluído) para pedidos de ata 2 kg
• 5 € (IVE incluído) para pedidos de máis de 2 kg e menos de 25 kg

Non é posible enviar pedidos de máis de 25 kg.

O prazo previsto de entrega é de ata 10 días laborables, contados desde a constancia por parte da Administración do pagamento efectuado pola persoa compradora. En todo caso, o prazo máximo de entrega será de 30 días.