Panorámica completa respecto dos recursos minerais sólidos cos que conta Galicia. Abrangue desde a paisaxe e a arquitectura ata a comercialización e usos.
Publicación que recompila as Actas do Congreso O Camiño de Santiago para o século XXI. O Camiño Portugués, celebrado en Pontevedra os días 22, 23, 24 e 28 de marzo de 2007, no que participaron persoas expertas nesta ruta, profesorado universitario, responsables de asociacións de amigos do Camiño e representantes públicos e privados relacionados con esta vía en Portugal.
Publicación que recompila as Actas do Congreso O Camiño de Santiago para o século XXI. O Camiño do Sueste-Vía da Prata, celebrado en Ourense os días 24, 25, 26 e 29 de abril de 2008, no que participaron amigos do Camiño, representantes das Administracións públicas con vinculación especial coa Vía da Prata, persoas expertas nos dous itinerarios, profesorado universitario, etc.
Ambicioso proxecto, que naceu en 2003 da colaboración entre a Universidade de Santiago de Compostela e a S.A. de Xestión do Plan Xacobeo. Nel compílase toda a información dispoñible sobre a devandita catedral en época románica, froito dun importante labor de investigación. Ademais de recoller as conclusións de anteriores estudos, propóñense novas teorías sobre algúns temas que estaban un tanto esquecidos, como a reconstrución da primitiva porta norte.
Publicación que recompila as Actas do Congreso O Camiño de Santiago para o século XXI. O Camiño do Norte, celebrado en Mondoñedo e Ribadeo os días 19, 20 e 21 de febreiro e 4 de marzo de 2009, no que participaron expertos nesta ruta, profesores universitarios, representantes eclesiásticos de Galicia e das demais comunidades. Na publicación recóllense tres grandes seccións: o Camiño para os peregrinos, o patrimonio cultural e ambiental e o turismo.
Publicación que aborda temas de gran relevancia dentro do ámbito xacobeo: o Camiño público e o Camiño como ben de interese cultural, o estudo da regulación que debe aplicárselle, a ordenación urbanística do Camiño de Santiago, a súa protección e promoción, así como o réxime sancionador ante as condutas que se entenden como constitutivas de infracción contra o patrimonio.
Catálogo da exposición: José Guitián. Fotógrafo en Compostela. 1950-1980. Con textos de Manuel F. Rodríguez e José Seijo Guitián. Recóllese unha ampla selección da obra fotográfica deste autor, recuperada para realizar a exposición e este catálogo, con imaxes na súa maioría inéditas. Coa súa cámara e durante corenta anos de traballo, José Guitián retratou Santiago e a súa veciñanza. As súas fotografías son hoxe un testemuño da vida compostelá durante estas catro décadas.
Catálogo da exposición, enmarcada nos actos conmemorativos do 400 Aniversario do Colexio de San Clemente, que recolle as obras de 29 artistas que tiñan como nexo a súa vinculación con este centro de ensino por ser nalgún momento profesores ou alumnos seus. Asorey, L. Garabal, Vidal Abascal, López Carballo ou Sevillano son algúns dos nomes aquí representados.
Novidoso libro colectivo, que celebra a escenificación do drama litúrxico "O Misterio de Elche" na igrexa compostelá de San Martiño Pinario. Con prólogo de Vicente Molina Foix e coordinado por Francisco Singul, nel participaron investigadores, historiadores e filólogos de varias universidades, nun conxunto de textos que forman unha sorte de fusión da cultura da "Festa" (Misteri d'Eltx) e o legado patrimonial do Camiño de Santiago.
Obra que recolle, de forma documental e gráfica, unha década de obras nos Camiños de Santiago en Galicia, que abrangue desde a rehabilitación de edificios para acondicionalos como albergues para peregrinos ata a construción doutros de nova planta para desempeñar a mesma función, e que conforman a Rede Pública de Albergues da S.A. de Xestión do Plan Xacobeo. Esta publicación foi seleccionada para os Premios de Deseño Editorial Daniel Gil, 2004.
Libro catálogo da exposición “Compostela. Camino de Santiago. Luz y vida”, que se presentou con motivo da celebración do Ano Xacobeo 2004. Os fotógrafos Tino Martínez e Vari Caramés ofrécennos, a través da súa particular visión, diferentes imaxes de lugares emblemáticos de Compostela, acompañados da palabra doutra relevante autora galega, Marina Mayoral.
Libro resumo da exposición Camiño de Paz. Mane Nobiscum Domine, que tivo lugar na catedral de Ourense no 2005, con motivo da celebración do ano dedicado polo papa Xoán Paulo II á Eucaristía. A mostra facía un percorrido pola historia e a arte de Galicia, en conexión co resto de Occidente, para evidenciar así a pegada do legado evanxélico na creatividade cultural galega, a través de pezas de ourivería, escultura, pintura, etc.
