Catálogo

Catálogo da exposición sobre Manuel Vilariño. After the whale.

O catálogo da exposición Camiños creativos, comisariada por Monserrat Pis Marcos, explora a relación entre o desprazamento e a arte, concretamente como o desprazamento a pé se integra como axente determinante do proceso artístico: camiñar para crear. Con textos de: Carmen Pena, Francesco Careri, Pilar Montero, Honi Ryan, Elia Torrecilla e Monse Pis.

Edición conmemorativa do catálogo da exposición: Foi un home. Laxeiro en América (Buenos Aires, 1950-1970). A mostra establece unhanova ollada sobre a obra de José Otero Abeledo (Laxeiro), amosando unha madurez plena que coincide coa súa longa estadía arxentina entre 1950 e 1970, período no que adquire a súa maior independencia artística. O catálogo inclúe textos de Carlos Bernárdez, Javier Buján, Antón Castro, Cecilia Doporto, fotografías das 42 obras que forman parte da exposición e unha reprodución do catálogo da Exposición de artistas gallegos que tivo lugar en 1951 en Buenos Aires.

Trátase do catálogo da exposición que perdurará no tempo. Consta dun digipack de tres corpos e un CD.

Guía da colección de arte do Museo de Belas Artes da Coruña.

Número XIII da revista científica multilingüe, Ad Limina, de carácter multidisciplinar e internacional, de investigación sobre o Camiño de Santiago e o fenómeno das peregrinacións. Nesta ocasión, trátase dun número monográfico especial dedicado á “Cultura escrita, mulleres e peregrinación na Europa Medieval”.

A Vía da Prata. Aires do sur proponnos un percorrido a través de 150 anos de historia da fotografía, que nos convida a reflexionar sobre a soidade, a distancia e o paso do tempo. A exposición componse dunha selección de fotografías do século XIX ao XXI, tomadas en diferentes puntos do percorrido do Camiño desde Sevilla a Santiago de Compostela da man de figuras consagradas e emerxentes da arte fotográfica.

Hamish Fulton (Londres, Reino Unido, 1946) é un artista cuxa obra é o resultado do encontro entre a arte e o camiñar. Leva desde 1969 realizando camiñadas por distintas paraxes do planeta: percorreu a Península Ibérica de costa a costa en varias ocasións, visitou case toda Europa, Canadá, Estados Unidos, México e Australia, e camiñou polas montañas da India e do Nepal. Con motivo da exposición Walking East, organizada polo Centro Galego de Arte Contemporánea, planeou un percorrido partindo desde Fisterra, en dirección a Santiago de Compostela, Pamplona e Roncesvalles ata Hendaia.

Esta publicación presenta unha serie de obras resultantes deste proxecto acompañadas dunha conversa na cal o comisario da exposición, Pep Benlloch, e o artista falan sobre a experiencia no Camiño e a carreira de Hamish Fulton como walking artist (artista camiñante).

Catálogo do proxecto expositivo sobre o recoñecido artista Jorge Castillo, especialmente centrado na súa faceta como escultor, e con destacadas inclusións dos seus debuxos e obra gráfica.

A publicación Por unha bioloxía da imaxe presenta dúas series sucesivas de obras da artista madrileña Clara Carvajal, Dioses de la frontera e Argucia, que se inscriben no que poderiamos chamar unha primeira aproximación desta artista á bioloxía da imaxe. Mediante este concepto plenamente innovador Carvajal indaga na dimensión plástica e escultórica da imaxe fotográfica.

Dioses de la frontera abre camiño a unha viaxe expositiva e vital: Beirut, esas mil e unha cidades desde onde Clara Carvajal resignifica as imaxes da Arab Image Foundation, os arquivos do xornal An-Nahar e do fotógrafo Émile Boulos Divers. Argucia, pola súa banda, supón un paso máis nesta percuda ao incorporar a tridimensionalidade en sete caixas que funcionan como contornos abertos.

Con ambas as series, Clara Carvajal introdúcenos nun xogo de espellos onde as imaxes rexorden en distintos medios para reafirmaren a súa existencia.

Caosmos é unha aproximación á traxectoria do artista galego Antón Patiño (Monforte de Lemos, Lugo 1957), centrada nunha escolma de pezas que abrangue distintas etapas do seu labor no eido das artes plásticas, desde a súa participación na fundación de Atlántica (referencia central para a arte galega nas últimas décadas) até a actualidade, pero tamén no ámbito da literatura e o pensamento, como autor de diversos libros de ensaio artístico e teoría da imaxe.

Crebas é un termo propio do léxico da Costa da Morte que designa todos aqueles obxectos que as mareas depositan na ribeira, como consecuencia dun naufraxio ou outras circunstancias. Baixo este título, esta publicación mostra unha selección de pezas datadas entre 1976 e 2019 que sintetizan a esencia da obra de Torres. É unha nova oportunidade de reler o seu traballo desde outras perspectivas, observando os vínculos existentes entre as diferentes etapas da súa traxectoria artística, que explora aspectos de carácter histórico, filosófico, político e antropolóxico, expresados a través de múltiples medios como a instalación, a fotografía, o debuxo ou a escultura. Aquí preséntanse unha serie de obras inéditas directamente relacionadas con Galicia, que enlazan coas súas primeiras pezas conceptuais dos anos setenta, articuladas en perfecto diálogo con obras posteriores, moi particularmente, instalacións multimedia, concibidas como un dispositivo de narración complexo, con frecuencia resultado dun exhaustivo proceso de investigación.